Aruba, 22 augustus 2010.  Brandon Arends ta enfrenta oposicion fuerte den su competencia di judo durante e Youth Olympic Games na Singapore. E ta pasa pa segundo ronda, probechando di un “bye”, pero despues ta topa e atleta Hyon di Noord Korea (Democratic People’s Republic of Korea). Brandon ta cuminsa ataca mes ora, yen di animo y convenci di duna fuerte oposicion. Den un momento den cua e ta duna su contrincante un poco espacio sinembargo, Hyon ta probecha y ta termina e pelea abruptamente, marcando un Ippon.

Brandon mester a pasa awor pa e ronda di perdedornan, caminda e ta topa e atleta Cisse di Senegal. Aunque cu fisicamente y tecnicamente Brandon tabata esun mas fuerte, e atleta di e pais Africano ta resulta mas habil strategicamente, probechando di un solo oportunidad cu e ta haña. Cu un tiro rapido, e pelea ta termina y Cisse di Senegal ta termina ganador. 

Pa Brandon e participacion na e Youth Olympic Games tabata un experiencia masha bunita y valioso. E ta na inicio di su carrera deportivo y cu mas experiencia competitivo sigur lo sa di desaroya su mes den un excelente judoka pa nos pais. Entrenador Betto Thiel ta comparti su pensamento: “Pa Brandon esaki tabata un competencia masha importante. Loke Brandon falta ta mas competencia y nos ta spera cu den e proximo tempo nos por dune e oportunidad di mehora su nivel. E ta un atleta hopi disciplina, cu gran potencial. Nos lo sigui apoye, pa asina e por yega su nivel optimal.”