Aruba, 22 augustus 2010.  Loke ta hasi e “Youth Olympic Games” asina special ta cu, banda di e programa deportivo, e atletanan ta participa na un programa educativo cultural, consistiendo di diferente actividad cu ta enfoca riba balornan Olimpico, medio ambiente, biba un bida saludabel, responsabilidad pa maneho di awa, y con pa asumi responsabilidad pa bo mes y pa bo compañeronan di equipo.

Na un forma masha atractivo, e actividadnan a wordo ofreci na e hobennan, cu a responde cu masha entusiasmo. Mayoria di e sesionnan ta completamente yen. E atletanan a papia cu campeonnan Olimpico den sesionnan yama “Chat with a Champion” y tabata tin e oportunidad di hasi nan pregunta. Nan a intercambia cu atletanan conoci, como parti di e “Athlete Role Model Program”. Nan a siña tocante e historia di e Weganan Olimpico, tocante e peligernan di doping, e peligernan di sigaria y alcohol, y tambe tocante e peliger HIV Aids.

E atletanan a wordo duna un “paspoort”, den cua nan por a colecta stampia cu cada actividad na cua nan a participa y finalmente tabata duna nan e oportunidad di gana premionan bunita. Alrededor di e ciudad di Singapore, den e diferente instalacionnan deportivo, gruponan di baile tabata duna presentacion, gruponan di deporte a splica e publico tocante nan deporte specifico y a duna muchanan e oportunidad pa sera conoci pa prome biaha cu nan deporte. 

Mirando e exito di e programa, Comite Olimpico Internacional ta satisfecho cu e meta original a wordo logra, esta pa usa deporte como un medio educativo, pa educa hobennan y hasi nan ciudadanonan mas completo. Intencion di COA ta pa inclui aspectonan di e programa aki tambe den e programa di Weganan di Reino, pa cua ya caba na Singapore a hiba combersacionnan inicial cu e coleganan di Comitenan Olimpico di Hulanda y Antiyas.

E portretnan hunto cu e articulo aki ta duna un impresion di e programa cultural educativo, parti di e Youth Olympic Games na Singapore.