Aruba, 22 augustus 2010.  E mesun scol cu a traha un obra di arte cu a gana un di e tres premionan maximo durante e Youth Olympoic Games na Singapore, esta “First Toa Payoh Secondary School” a duna un bunita presentacion tocante nos isla den e Villa Olimpico na Singapore. Pa e ocasion a invita e delegacion Arubano pa ta presente y pa ricibi un obra di arte cu alumnonan di e scol a traha specialmente pa e ocasion.

Como parti di un proceso pa trece hobennan di e paisnan participante na e Youth Olympic Games mas serca di otro, a uni scolnan basico y secundario di e paisnan cu otro. Den caso di Aruba, e ““First Toa Payoh Secondary School” a wordo asigna Aruba y a tuma nan tarea hopi na serio. Durante lunanan largo nan a studia tocante Aruba, su historia, su hendenan, su cultura y loke ta hasi Aruba asina special. E alumnonan a traha T-shirtnan specialmente pa e ocasion, dunando reconocimento na carnaval di nos isla. Tabata masha bunita mes pa mira nos mata di Div Divi, dibuhonan di indian, nos edificionan y te hasta nos shoco aya na Singapore. Como parti di e “booth” cu e scol a traha den e Youth Olympic Village, por a mira nos bandera bula orguyosamente. 

Atletanan Joey Ponson y Saskia Postma a keda impresiona cu e trabou di e hobennan y a saca portret cu nan. Hefe di mision, Brian Lopes a bisa: “Si nos tabata sa di esaki, nos por a manda mas material pa nan, pa asina nan por a siña mas tocante Aruba.”  

Secretaria General di Comite Olimpico Arubano, Nicole Hoevertsz a ricibi e obra di arte for di man di e profesora Gillian Elliott cu a coordina e proyecto pa e scol. E pintura ta demostra na un forma colorido e union entre Aruba y Singapore, loke ta realmente algo masha bunita.