Aruba, 27 augustus 2010. E personahe di judo mundialmente conoci, Anton Geesink a fayece diabierna na edad di 76 aña. Na 1961 Geesink tabata e prome persona no-hapones cu a sa di conquista e titulo campeon mundial den judo den e categoria habri.

E peso pisa a bira un leyenda na Hapon na momento cu ela gana e medaya di oro durante Weganan Olimpico di Tokio na aña 1964. Después ela bira dirigente deportivo den e Federación Internacional di Judo y den Comité Olimpico Internacional. 

Fuera di su titulo di campeon mundial na 1961, ela sa di titula como mihor di mundo na dos ocasion mas. E ciudadano di Utrecht tabata 21 biaha Campeon Europeo y a gana e titulo di Campeon Nacional di Hulanda na numeroso ocasión. Cuater biaha ela wordo eligi como “Deportista di Aña”. E tabata tambe tres biaha campeon nacional den lucha greco-romano.  

Despues di su carrera activo como deportista, Geesink a keda activo den deporte como dirigente. Prome ela hasi esey den e deporte di judo, caminda e tabata responsable pa e cambio di regla cu a hasi cu judokanan ta aparece den paknan blanco y blauw, pa asina hasi mas facil pa arbitronan por distingui. Desde 1987 e tabata Miembro di Comité Olimpico Internacional. 

Na 1999 ela haña su mes den un controversia pa motibo cu como miembro di e comision di evaluacion e lo a ricibi placa di e comite organizador di e Weganan Olimpico di Salt Lake City. Geesink su nomber a wordo “limpia”, pero toch ela ricibi un reprimenda pa motibo cu e apariencia di conflicto di interes a causa daño na e bon nomber di IOC. 

Geesink tabata tin e titulo di decimo dan den judo, un di e gradonan mas halto cu ta existi. Ela ricibi e titulo aki na 1997. Solamente diesocho judoka a yega di wordo otorga e grado aki, di cua solamente tres no ta Hapones. Geesink a wordo condecora pa La Reina como Ridder in de Orde van Oranje-Nassau y a wordo condecora tambe na Hapon. Na 2004 ela wordo inclui den e “Hall of Fame” di e Federacion Internacional di Judo.