MIEMBRONAN DI COA TA APROBA PRESUPUESTO Y PLAN DI MANEHO PA 2012

Aruba, 22 januari 2012. Den un Asamblea General cu a wordo atendi pa un mayoria amplio di e federacionnan miembro, a keda aproba e presupuesto y tambe e plan di maneho pa Comite Olimpico Arubano pa aña 2012. Cu esaki directiva di COA ta haya sosten pa continua cu e forma cu ta maneha e organizacion cupula di deporte di nos pais. E asamblea ademas tradicionalmente ta un excelente ocasion pa intercambia informacion entre COA y su miembronan, loke semper ta tuma lugar na un forma masha positivo y dinamico.

COA ta celebra tur aña dos asamblea, esta e reunionnan general cu tur su 24 federacionnan deportivo miembro. E prome asamblea ta pa trata e relato financiero y e relato di tur e actividadnan di e aña anterior, mientras cu den e segundo mitar di aña ta celebra un asamblea pa trata e presupuesto y e plan di maneho pa e proximo aña. Pa varios motibo a hala e fecha di e segundo asamblea di COA pa januari, pa asina por a garantiza un participacion amplio. Y esey a wordo logra! 

E asamblea a cuminsa cu un introduccion di parti di Presidente di COA, Roy Mezas, cu a resumi aña 2011 y tur e actividadnan cu a logra realisa. Recordando e gran personahe cu a dedica henter su bida na deporte y cu recientemente a fayece, e asamblea a observa un minuut di silencio pa duna respet y reconocimento na Jerry Gomes.

Tesorero Edwin Roos a presenta e presupuesto pa 2012 y e biaha aki den un formato nobo. Hunto cu accountant Ernst & Young a yega na e formato den cua a percura pa e presupuesto ta mas realistico y mas facil pa compronde. 

Secretaria General Nicole Hoevertsz a presenta e plan di maneho, delineando e proyecto y actividadnan cu tin programa pa e aña cu a caba di inicia. Naturalmente e participacion na e Weganan Olimpico di London na juli ta domina e calendario, pero adicional na esaki tin hopi otro actividad cu COA ta desea di ehecuta y desaroyonan cu ta desea di continua.

E forma cla y e obhetivonan positivo pa e organizacion y su miembronan, a hasi cu tanto e presupuesto y e plan di maneho a wordo aproba sin ningun obhecion di parti di e asamblea, pues cu acceptacion amplio.

Pa completa e encuentro cu e miembronan, a tuma lugar un presentacion sumamente interesante di parti di e cuater "direccionnan" di COA, esta e Direccion Tecnico, Direccion di Desaroyo, Direccion di Desaroyo Olimpico y e Direccion di Marketing. Director di COA, Patrick Werleman a introduci e parti aki, poniendo ademas e linea comun entre e trabou di e diferente direccionnan y e nuebe comisionnan cu ta activo den COA. A toca turno na e directornan cu ta encabesa cada un di e areanan aki (Edmundo Josiah y Robbie Falconi, mientras cu den ausencia di Sue Ann Leong, Patrick Werleman a sa di tuma e presentacion aki na su encargo), pa duna un splicacion amplio di e prioridadnan cu a defini pa e aña aki. Un aspecto specifico cu ta rekeri accion directo y inmediato di parti di e federacionnan ta trata e tema di doping, caminda presidente di e Comision Anti Doping, Angelique Koolman a comparti algun informacion actual cu e miembronan.

Cu esaki e asamblea general di Comite Olimpico Arubano a termina na un forma exitoso. Aña 2012 ta priminti di bira uno sumamente yen di actividad atrobe, pero cu aporte di tur federacion, staff, comisionnan y directiva di COA, tin tur confianza cu lo sa di sigui hiba e organizacion y deporte Arubano den su totalidad padilanti, den e bon direccion.