Conoce Daniella van den Berg, atleta di Weganan Olimpico di Londres 2012

Daniella van den Berg Atleta Olimpico 2012 210-07-2012- Daniella van den Berg, a cuminsa practica e deporte di landamento cu apenas 5 anja di edad. E tempo ey e no por a scohe nada pa su mes ainda, su mayornan tabata esnan cu a hinke den e deporte, pero asina mes e ta hopi contento cu e escohencia aki. Manera tur deportista, Daniella tambe tabata tin un experiencia cu mas ta keda den su memoria, esaki den e competencia di CCCAN na Barquisimeto,Venezuela unda Daniella a logra medaya di Oro.

Daniella a competi contra atletanan di paisnan grandi den e continente Latino America. Daniella tin un record personal ariba 400 IM cu tempo di 5.16., cual tambe ta e record na Aruba den e evento aki. E logro di mas grandi te cu awor di Daniella ta e conkista di e medaya di Plata na e campeonato Suramericano 2011 na Lima, Peru, y cu esaki a logra obtene su clasificacion pa e Weganan Panamericano 2011, teni na Guadalajara, Mexico.

Tur deportista tin un soño, Daniella no ta un excepción. Desde chikito e tabata soña pa bira un atleta Olimpico, awe su soño lo bira realidad. Según Daniella, nunca rindi y haci hopi sacrificio si bo kier yega na bo meta. Bo mester tin corahe y semper bai "all out". Siguientemente algun pregunta cu nos a haci Daniella relaciona cu su participacion na e Weganan Olimpico di Londres 2012.

1. Con ta bayendo cu Bo preparación pa cu e Weganan Olímpico?
Wel, mi preparacion ta bayendo bon. Mi a bai Merca na Augustus 2011 pa biba y train, y ela dura un poco tempo pa mi a custumbra cu e entrenamentonan y cambio di bida y scol. Pero despues di mas o menos 6 luna mi a custumbra y tambe a cuminsa ripara con e cambio ta yudando hopi. Na Maart y April mi a participa na dos competencia grandi, un na Orlando y tambe Carifta na Bahamas unda mi a bay cu e team di Aruba. Na tur dos competencia mi a logra mehora mi tempo nan riba e 400 y 800 Freestyle y a logra e metanan cu mi a pone pa termino corto pa e competencianan aki.
2. Kiko e lo ta pa Bo persona ser un representante di Aruba na un Wega Olimpico?
Pami como un mucha muhe na un edad jong asina, e lo ta un experiencia hopi great, cu mi tin sigur bo no ta lubida nunca! Mi ta kere cu tur hende cu haya un oportunidad di representa nan pais na un Wega Olimpico mester ta hopi contento y orguyoso di por ta eynan. Pa representa bo pais na un competencia asina grandi manera Weganan Olympico kiermen cu bo ta entre e mihornan na bo pais, hunto cu tur otro mihor atletanan di mundo. Mi lo ta hopi contento y sintimi honra si esaki ta ami paso esey kiermen cu tur e sacrificio di entrenamento, bai laga mi famiya, amigonan y e esfuerzonan haci pa hopi anja ta pay off!
3. Kiko Aruba por spera di Daniella van den Berg pa Weganan Olympico na Londres 2012?
E ultimo anja, for di Augsutus 2011, mi a muda pa Florida, pa dedica mas tempo nami entrenamento pa e weganan aki. Durante e anja, mi a tuma parti na un preparacion intensivo y a experencia un mehoracion significante den mi temponan. Mi por a ripara esaki especialmente durante competencianan recien manera Carifta 2012, cual a tuma lugar na Bahamas, caminda mi a baha mi tempo den e 800 Free cu mas di 10 seconde. Hunto cu mi coaches, na Merca y na Aruba, a wordo tuma e decision pa cambia mi evento principal pa e 800 Free, pa motibo cu esaki ta caminda nan a pensa mi lo tin un miho resultado. Cu e preparacionan adicional den e ultimo 3 luna, mi ta sinti mi mes cla pa e reto aki y ta confia cu mi lo logra mehora mi tempo ainda mas, pa cual mi a pone un meta caba. Aruba por spera di mi persona, cu mi lo ta un digno representante y lo carga mi bandera cu orguyo. Mi lo duna tur cu tin pa haci un bon papel pa nos isla den e mundo di landamento.

gallery1 gallery1 gallery1
gallery1 gallery1  

Copyright © by Comite Olimpico Arubano. All rights reserved.