Weganan Olimpico den cifra

Aruba, 12 juli 2012. For di e 10.490 atletanan cu ta bayendo London pa competi, te na e 20.000 periodistanan cu lo cubri e Weganan cu ta cuminsa 27 di juli, e Weganan Olimpico di 2012 ta ofrece un sin fin di cifra y estadistica.

• 11 miyon ticket pa eventonan Olimpico y Paralimpico, di cua 75 porciento lo wordo bendi na publico Ingles. Sponsornan, oficialnan y broadcasters por cumpra 13 porciento di e ticketnan, mientras cu e 12 porciento restante ta na benta a

traves di Comitenan Olimpico Nacional den nan respectivo paisnan.

• $14.5 biyon dollar a wordo inverti na organizacion di e weganan. Esaki ta casi cuater biaha mas di loke a calcula na momento cu na 2005 London a pidi pa ta sede di e weganan. E presupuesto original pa seguridad y pa e ceremonianan di apertura y clausura a wordo redobla. Seguridad awor ta costa alrededor £553 miyon, y e ceremonianan tin un presupuesto di £81 miyon.

• 10.490 atleta lo competi den 26 deporte Olimpico den un total di 302 evento di medaya. Nan lo wordo someti na 5.000 prueba anti-doping. Alrededor di 4.200 atleta Paralimpico ta participa den 503 evento pa medaya, den 20 diferente deporte.

• 1 miyon pida di equipo deportivo: 26.400 bala di tennis, 600 bala di basketball y 6.000 target pa e deporte di tiro con arco a wordo cumpra pa e Weganan.

• No menos cu 150.000 condom lo wordo parti den e Villa Olimpico di atletanan.

• 34 instalacion reparti den Gran Bretania, incluyendo nuebe den e Olympic Park den e parti oost di London. E stadion Olimpico, den curazon di e parke, a tuma tres aña pa construi y a usa 10.000 tonelada di staal. E instalacionnan deportivo ta conta cu 10.000 wc temporal – “suficiente pa duna servicio na henter e poblacion di e isla Malta”, organizadornan ta bisa.

• Dos miyon hende lo bishita London pa e Weganan, Minister pa e Weganan Olimpico, Hugh Robertson, ta bisa. Expectadornan lo hasi alrededor di 20 miyon biahe den e sistema di transporte publico di London, incluyendo 3 miyon riba e dia mas ocupa.

• 14 miyon cuminda lo wordo sirbi durante e weganan, usando 25.000 kipashi, 100 tonelada di carni, 75.000 liter di lechi y 330 tonelada di fruta y berdura.

• 46.000 trahador di construccion a traha e Olympic Park y Olympic Village, mientras cu e weganan mes a envolve un forza laboral total di 200.000 trahador, incluyendo 100.000 contratista y 70.000 voluntario.

• 12.875 kilometer (8.000 miya) ta e ruta pa e relevo di e antorcha. E candela Olimpico ta biahando full rond di Gran Bretania durante dies siman, biahando alrededor di 177 miya pa dia.

• 70 carne, 12 cabay, 3 baca, 2 cabrito, 10 galiña y 3 cacho. Henter un boerderij lo forma parti di e ceremonia di apertura, ora cu e stadion Olimpico lo wordo transforma den un pueblo idilico Ingles.

Copyright © by Comite Olimpico Arubano. All rights reserved.